Usa Bo Banco Responsablemente
Con pa maneha bo finanzas den tempo incierto
E pandemia COVID-19 a trece incertidumbre den nos economia y den nos bida. Mientras economia ta recupera, ta importante pa maneha bo finanzas responsablemente y prepara bo mes pa e futuro.
Cosnan cu bo por haci awor mes pa maneha bo finanzas
Si ta posibel, trata na pone placa un banda den caso di emergencia. Tambe ta importante pa controla bo finanza y aplica e miho manera pa maneha bo placa den un corto plazo. Sigui e pasonan pa yuda bo cu bo so situacion financiero.
Paso 1. Traha un presupuesto di emergencia
Identifica cual entrada bo tin (y di e otronan den bo hogar). Bo por tin diferente manera di entrada, for di bo salario, di bo negoshi, pension, etc. Identifica na kico bo ta gasta placa. Bo lo tin gasto fiho tur luna manera bo hipoteca of huur, seguro, recibo di utilidad, cuminda y cuido di mucha. No lubida riba e gastonan variabel, esakinan ta gasto cu ta varia dependiendo di e luna, manera contribucion di scol, gasto na supermercado, gasto di dentista, impuesto riba auto, etc.Priorisa bo gastonan y wak si bo por yega na un areglo di pago, of trata di baha bo gastonan. Purba na pone placa un banda pa bo gastonan fiho y gastonan variabel pa 6 te 12 luna.
Buki di Presupuesto 2021
Tip y guia pa maneha bo presupuesto.
Paso 2. Sigui bo gastonan
Mantene bo gastonan di dia pa dia na bista, pa asina bo no gasta mas cu bo tin actualmente. Revisa bo statementnan di banco di e ultimo lunanan, mira unda kisas bo por baha bo gastonan. Bo por mira bo statementnan online usando Aruba Bank Online y usa e Aruba Bank App pa check bo saldo y sigui bo gastonan. Siguiendo bo gastonan probablemente lo yuda bo gasta menos na cos cu no ta asina necesario pa bo y bo famia den e situacion actual.
Paso 3. Busca manera pa baha gasto
Pa yuda bo entrada actual rindi mas largo, trata na reduci gasto cu no ta esencial for di bo presupuesto.
Considera baha e gastonan di diberticion y pensa adelanta riba bo gastonan di cuminda.
Planea bo cuminda di antemano, y traha un lista di compras prome cu bo bay supermercado. Esey ta haci bo trip pa bay haci compras mas rapido, pero tambe e lo evita bo di cumpra cos nan inecesario.
Considera otro articulo cu bo no mester, manera abono pa cual bo ta pagando y no ta usa, y considera cancela nan temporalmente.
Por ta bo mester corta den gastonan pa bo por maneha period nan aki.
Paso 4. Considera spaar
Considera pone placa na banda pa bo futuro. E por ta parce dificil pa logra cumpli cu bo gastonan mensual y alabes spaar. Pero cambionan chikito por haci un diferencia grandi. Cuminsa drenta den e habito di spaar. Hasta un suma chikito cada luna por haci un gran diferencia.Spaar pa un down payment riba un cas of auto, un fondo di emergencia of un vacacion di bo soño por ta mustra dificil. Corda bo por logra bo metanan di mas dificil si bo ta traha riba nan.
Paso 5. Papia cu esnan cu bo debe
Si bo tin problema pa paga bo hipoteca, credit card of recibo di utilidad pa motibo di perdida di trabao of entrada, comunica cu e companianan pa posibel opcion of plan di pago.