Nos tey pa yudabo!

Nos tey pa yudabo! Durante di e situacion di Coronavirus (COVID-19), nos ta haci nos maximo esfuerzo pa mantene nos clientenan informa.
Nos a compila un lista di e preguntanan mas comun akinan:

1. Tur cliente ta bin na remarca pa e Plan di Alivio?
Aruba Bank N.V. a introduci e Plan di Alivio pa clientenan cu a perde entrada como consecuencia di e crisis di COVID- 19. Pa duna prioridad na e clientenan cu ta den necesidad di ayudo financiero inmediato, Aruba Bank N.V. lo atende cada caso ariba base individual (case-by-case basis). Ta keda na discrecion di Aruba Bank N.V., pa aproba e Plan di Alivio pa solamente e clientenan cu mester di asistencia. Clientenan Corporativo, cu a perde entrada, mester tuma contacto cu nan Account Manager.

2. Con mi por aplica?
Clientenan cu ta desea di aplica pa e Plan di Alivio, por tuma contacto cu nos Contact Center na +297 527-7777 pa por traha un cita cu un di nos representantenan.
 
3. Mi por aplica pa e Plan di Alivio pa tur mi prestamo nan?
E Plan di Alivio ta aplicabel pa tur prestamo nan existente, pa personanan cu a perde entrada. E Plan di Alivio no ta aplicabel pa pagonan di tarheto di credito of pa seguronan.

4. Mi pagonan mensual lo bay subi?
E termino nan di pago di tur prestamo lo wordo extendi cu por lo menos e cantidad di luna cu a wordo duna un Alivio, pa clientenan cu a perde entrada, di tal manera cu e pago mensual no lo wordo afecta. 

5. Con esaki ta bai afecta mi pago di hipoteca of prestamo na final di e periodo di e Plan di Alivio?
Den e caso di un moratorium ariba un prestamo of hipoteca, e interes cu no ta paga durante e alivio ta wordo capitaliza, por lo tanto e efecto di e alivio ta depende di e saldo pendiente di e hypoteca y e periodo restante di e prestamo. Cada respuesta ta varia a base di e asistencia cu e cliente ta ricibi. 

6. Mi no a perde entrada, pero mi ta preocupa pa e proximo lunanan. Mi por aplica pa e Plan di Alivio awor caba?
Arubabank N.V. por asisti e cliente for di e momento cu e cliente perde un gran parti di su entrada. Aruba Bank N.V. no ta encurasha clientenan di aplica pa e Plan di Alivio si no a perde entrada na e momento aki.

7. Si acaso mi no tuma e Plan di Alivio awor, y despues mi sinti cu toch mi mester a tume, mi por pidi e plan di alivio ainda?
Si, e cliente por dicidi pa aplica despues, si e perde entrada. Cliente mester tuma contacto cu nos Contact Center na +297527-7777 pa por traha un cita of por haci esaki tambe via nos sistema di Eappointment ariba nos website: www.arubabank.com. 

8.Mi por paga solamente interes of haci un pago parcial ariba mi prestamo?
Si, esaki ta posibel. Aruba Bank N.V. lo trata cada peticion a base di case-by-case.

9. Kiko mi por haci si mi ta interesa pa e Plan di Alivio, pero no pa tur mi prestamonan?
Cliente cu a perde un gran parti di su entrada mester tuma contacto cu banco via nos Contact Center na +297 527-7777. 
 
10.Mi tin cu entrega un prueba di perdida di entrada?
Si, esaki ta necesario.

11. Cuanto tempo e ta tuma pa procesa mi aplicacion pa e Plan di Alivio?
Tur Plan di Alivio ta wordo procesa prome cu e proximo termino di pago. E cliente lo wordo contacta pa e respresentante cu a procesa e aplicacion.
 
12. Con un cliente sin Cuenta Coriente ta yega na su fondonan?
Nos ta haci nos maximo esfuerzo pa percura cu tur cliente sin Cuenta Coriente (solamente Cuenta di Spaar) di Aruba Bank N.V. ricibi un tarheta di debito (ATM). E tarheta lo wordo entrega na e cliente personalmente. Tur cliente lo ricibi un guia tambe con pa uza e tarheta na un mashin di ATM pa lanta placa. E persona cu tin solamente un Cuenta di Spaar no por haci uzo di e tarheta na POS, solamente na ATM. Pa mas informacion yama nos Contact Center na 527-7777.

13. Smart Deposit Machine – pago di utilidad: Con bo ta haci pago di utilidad via e Smart Deposit Machine?
1. Hinca bo tarheta di debito
2. Selecta “Pago di Cuenta”
3. Selecta bo tipo di pago: a. Paga for di cuenta
b. Paga cu cash deposit
4. Scohe bo compania di pago
5. Yena e suma cu bo tin cu paga
6. Scan e barcode riba e recibo
7. Confirma si e suma ta correcto
8. Warda un rato pa e mashin procesa e pago
 
14. Ki ora boso Contact Center ta habri?
Nos Contact Center ta habri di dialuna pa diabierna for di 8am te cu 6.30pm, diasabra for di 9am te cu 5pm y diadomingo for di 9am te cu 1pm.
 
15. Pakiko mi SWIFT Transfer no a pasa?
Pa por proteha e reserva di divisa, Banco Central di Aruba (CBA) a anuncia e suspencion di emision di permiso di divisa pa tur transaccion saliente di capital den cual ta transmiti placa pa exterior
 
16. Ken por manda SWIFT transfer?
Persona natural y persona huridico, residente cu cuenta na banconan na Aruba.
 
17. Ki tipo di SWIFT transfer ta permiti?
Permiso extraordinario di divisa o declaracion otorga caba ta keda vigente sin mas. Transaccion pa exterior pa cual no ta requeri un permiso di divisa extraordinario por tuma lugar normalmente. Esaki ta conta tambe pa transaccion cu ta consecuencia di transaccion di capital cu a ser comprometi promer cu dia 17 di maart ultimo y cu tabata cai bao di e exoneracion general di respectivamente AWG. 300.000 pa persona natural y AWG. 750.000 pa persona huridico. Ta trata aki por ehemplo di pago riba prestamo cu a keda comprometi promer cu dia 17 di maart 2020 y cu ta cai bao di e sumanan limitante corespondiente indica.

18. Cual ta e SWIFT Transfers cu no lo wordo procesa?
1. Otorgamento di prestamo na no residente;
2. Pago anticipa riba prestamo, ricibi anteriormente di exterior;
3. Inversion den valor den exterior;
4. Participacion di un residente den un empresa stranhero;
5. Compra di bienes inmueble na Aruba o den exterior di no residente;
6. Transaccion pa cuenta propio den exterior pa persona natural;
7. Transaccion pa cuenta propio den exterior pa persona huridico y demas entidadnan;
8. Transaccion di cuenta coriente na compania matriz, subsidiario o ruman pa persona huridico;
9. Pago di dividendo o ganashi na no residente; y
10. Demas transaccion di capital, cu segun criterio di CBA ta igual na transaccion di capital, bao di cual regalo, donacion y herencia.
 
19. Ki documentacion mester entrega pa cada transferencia di SWIFT cu ta wordo manda na un cuenta bancario den exterior?
1. Recibo of Cobransa
2. Contrato di Huur
3. Credit Card Statement
4. Acuerdo di Compra (Purchase Agreement)
5. Acuerdo di Hipoteca (Mortgage Agreement)
6. Acuerdo di Prestamo (Loan Agreement)
(Den caso cu tin mas cu un mester manda tur)

20. Con mi por pidi un tarheta di debito (ATM) di Aruba Bank?
Pa aplica pa un tarheta di debito (ATM) nobo of pa renoba un existente, cliente mester yena un formulario cu Contact Center ta provee. E formulario mester wordo firma y manda bek hunto cu un imagen di e copia di un ID valido na info@arubabank.com. Pa ricibi e formulario por yama 527-7777 of email: info@arubabank.com, of un message via Whatsapp 592-7777.

21. Mi a aplica pa e Plan di Alivio y mi no a ricibi un respuesta ainda, kiko mi mester haci?
Cliente cu a aplica pa e Plan di Alivio y no a ricibi un respuesta, mester tuma contacto cu nos Contact Center na +297 527-7777.

22. Mi a aplica pa e Plan di Alivio y mi cuenta a wordo debita, kiko mi mester haci?
Cliente cu a aplica pa e Plan di Alivio y no a ricibi un respuesta, mester tuma contacto cu nos Contact Center na +297 527-7777.

23. Unda mi por haña e formulario pa cancela mi Standing Order?
Pa ricibi e formulario por yama 527-7777 of email: info@arubabank.com, of un message via Whatsapp 592-7777.
 
24. Con mi por cancela mi Standing Order (p.e, FCCA, Island Finance)?
Cliente cu ta desea di cancela su standing order, mester yena un formulario ricibi for di Contact Center. E formulario aki mester wordo yena y wordo manda bek cu un copia di un ID valido na info@arubabank.com. *Por fabor tuma nota cu cliente di FCCA mester aplica pa ricibi e Periodo di Gracia for di FCCA. Cliente lo ricibi un carta di confirmacion for di FCCA; e carta aki tambe mester wordo entrega.*

25. Ki documento mi mester manda pa cancela mi Standing Order?
Copia di e siguiente documentonan mester wordo entrega cu e peticion:
a. Formulario di standing order yena completo y firma pa e cliente
b. Copia di un ID valido di e cliente
c. Carta di confirmacion di cancelacion di FCCA, Island Finance of otro compania si esaki ta aplicabel
*Por fabor tuma nota cu cliente di FCCA mester aplica pa ricibi e period di gracia for di FCCA. Cliente lo ricibi un carta di confirmacion for di FCCA; e carta aki tambe mester wordo entrega.*